Simu junti a sta Nuvena
Canto tradizionale di Natale
“Simu junti a sta Nuvena“, canto tradizionale Siciliano di Natale.
TESTO
a Maria didicata,
ca nni cunta quanta pena
pricidì la gran jurnata.
Quannu Diu s’avia a ‘ncarnari
mannà l’angilu Gabrieli:
«A Maria m’ha salutari,
la Regina di li celi».
Quannu l’angilu scinnì jusu
e guardà ddu bellu visu,
arristà tuttu cunfusu,
si scurdà lu Paradisu.
Tanti seculi sù passati
ca s’aspetta lu Missia
e li jorna su arrivati
ppi partirisi Maria.
San Giuseppi era cunfusu
ppi la via ca aviva a fari
e lu tempu arrigurusu
ca si misi a nivicari.
E Maria ubbidienti
a cavaddu si mittia.
San Giuseppi caminava
e la ritina tirava,
la tirava longa longa
San Giuseppi e la Madonna.
«Arrivati a Bettilemmi
passerannu li nostri affanni,
haiu dda tanti parenti
boni amici e canuscenti».
«Tuppi, tuppi parintuzzi»
«E cu iè?»«Viniti a apriri»
«Nun si pò boni gintuzzi,
nun avimu cchi vi dari».
«Spusa mia, cara Signura
e sta sira unni nni scura,
cu n’ammutta e cu nni manna
Jamuninni a ‘n’antra banna».
Fori, fori di la cittadi
na gruttidda cci ‘mpararu
e la nivi ca cadiva
si ci arriparà Maria.
San Giuseppi caminava
e la ritina tirava,
la tirava curta, curta,
San giuseppi nni la grutta.
O gruttidda affurtunata,
quali fu la rannizza,
ca di stadda addivintasti
paradisu di dulcizza!
Ci mancavanu palazzi
a lu Re di la natura?
Vonsi nasciri a li strapazzi
‘ntre ‘na povira mangiatura.
Mezzanotti a la campia
e ‘na stidda stralucenti,
annunzià a tutti li genti
ca era natu lu Missia.
Li pastura spavintati
ca a sett’uri era già chiaru
a la grutta ammaliati
ccu gran prescia si purtaru.
E truvaru a Re du cielu
‘n mizzu a un vò a u’ sciccariddu
riparatu di lu gelu
ccu nu strazzu di panniciddu.
A migliara l’angiuliddi
«Gloria, gloria» ci cantaru
e i pastura ccu i ciuriddi
‘nghinicchiuni l’aduraru.
San Giuseppi caminava
e la ritina tirava,
la tirava di continu
San Giuseppi e lu Bamminu.
